Pse radha ka rëndësi
Shumica e punëve të pastrimit mbarojnë brenda ditës: xhamat, kuzhina, banjat, dyshemetë. Tekstilet e mëdha janë ndryshe. Tapeti, perdet, jorganet dhe batanijet dalin nga shtëpia, lahen, thahen dhe kthehen pas disa ditësh. Divani dhe dysheku lahen në vend, por duan disa orë që të thahen.
Kur radha është e gabuar, puna bëhet dy herë. Kur lani dyshemenë dhe pastaj ngrini tapetin për ta dërguar në larje: pluhuri pastaj bie mbi dyshemenë e larë. Kur lani xhamat dhe pastaj hiqni perdet: pluhuri i tyre bie mbi pragjet që sapo keni fshirë. Rregulli është i thjeshtë: nisni me atë që zgjat më shumë dhe mbaroni me dyshemenë.
Tre javë para festës: gjërat që dalin nga shtëpia
Këto punë nuk varen vetëm nga ju, por edhe nga dita kur kalon furgoni në zonën tuaj. Prandaj nisen të parat.
- Tapetet dalin të parët. Ndërsa janë në larje, dyshemeja poshtë tyre është e lirë: e lani një herë, me qetësi, dhe nuk i lëvizni mobiljet dy herë.
- Perdet dërgohen për larje bashkë me tapetin. Lani xhamat, kornizat dhe orenditë e tjera të shtëpisë.
- Jorganet dhe batanijet e dhomës së mysafirëve, që kanë ndenjur në dollap që nga pranvera, marrin erë ngaqë kanë qëndruar mbyllur për një kohë të gjatë. I marrim në të njëjtën kohë me tapetat dhe kthehen të pastruar dhe të paketuar në qese. Lexo për më shumë te larja e jorganeve dhe e perdeve.
- Divani dhe dysheku direkt nga shtëpia: i lajmë në vend dhe thahen brenda 4–8 orëve. Na thoni disa ditë para ardhjes së mysafirëve ose festave, që të vijme ti pastrojmë.
Të gjitha mund të bëhen në të njëjtën vizitë: tapeti dhe perdet shkojnë në punishte, divani dhe dysheku lahen atë ditë në shtëpi, dhe ju dërgojmë një ofertë të vetme.
Kur ta porosisni larjen e tapetit, sipas zonës
Tapeti kthehet brenda javës, zakonisht 3–5 ditë pas marrjes. Tapetet e leshit dhe ato shumë të trasha mund të duan një ditë më shumë tharje, sepse nuk paketohen pa u tharë deri në bazë. Por afati nis nga dita kur kalon furgoni në zonën tuaj, jo nga dita kur na shkruani, dhe kthimi bëhet përsëri në një ditë itinerari. Prandaj afati i sigurt ndryshon nga zona në zonë:
| Zona | Ditët e marrjes | Na shkruani të paktën |
|---|---|---|
| Tirane, qendër | Çdo ditë pune | Një javë para festës |
| Tirane, perëndim: Astiri, Kombinati, Yzberisht | E hënë dhe e enjte | 10 ditë para |
| Tirane, lindje dhe veri: Fresku, Linza, Sauk | E martë dhe e premte | 10 ditë para |
| Durres, Plazh, Golem | E martë dhe e shtunë | 10 ditë para |
| Kamez, Kashar, Vore | E mërkurë | Dy javë para |
| Shijak, Sukth | E shtunë | Dy javë para |
Lagjet e çdo zone dhe ditët e marrjes janë te faqja e zonave. Për Tiranen dhe Durresin ka edhe faqe më vete, me afatet e tyre.
Afatet në tabelë janë orientuese, jo premtime: data e saktë varet nga dita e javës kur porosisni dhe nga sa porosi ka ajo javë. Na shkruani në WhatsApp me një foto të tapetit dhe jua konfirmojmë datën e marrjes dhe të kthimit para se ta marrim.
Nëse e keni lënë për javën e fundit
Kemi edhe sherbim ekspres, me kthim brenda 24–48 orëve. E konfirmojmë vetëm kur ka vend në planifikimin e ditës. Para festave shumica e familjeve mendojnë për larjen e tapetave në të njëjtën kohë. Na kontaktoni për disponueshmëri: pyesni në WhatsApp për ditën konkrete dhe do t'ju përgjigjemi nëse e marrim përispër apo jo.
Divani dhe dysheku kërkojnë më pak kohë, sepse lahen në shtëpi dhe thahen brenda ditës.
Java e festës: radha e pastrimit në shtëpi
Kur tekstilet janë në larje, pjesa tjetër e shtëpisë pastrohet nga lart poshtë, sepse pluhuri bie gjithmonë:
- Llambat, raftet e larta, majat e dollapëve dhe kornizat e dyerve.
- Xhamat dhe pragjet, persa kohë perdet janë ende në larje.
- Kuzhina: furra, aspiratori dhe frigoriferi. Hidhni ushqimet e skaduara.
- Banjo. Pas pastrimit lini dritaren hapur, që lagështia të dalë.
- Dhoma e mysafirëve: çarçafë të pastër, jorganet e larë, jastëkë të ajrosur.
- Dyshemetë në fund, dhomat e tjera me radhë.
- Tapeti shtrohet vetëm kur dyshemeja është krejt e thatë. Lagështia e mbyllur poshtë tij është fillimi i mykut, sidomos në dimër.
- Perdet varen të fundit, kur pluhuri ka rënë.
Dita kur kthehet tapeti
Tapeti vjen i thatë plotësisht, i krehur dhe i mbështjellë në qese. Hiqeni qesen/celofanin sa e shtroni: një tapet i thatë nuk ka pse të rrijë i mbyllur, dhe vijat e lehta nga mbështjellja zhduken vetë brenda 1-2 ditësh.
Nëse keni ndërmend të lëvizni mobiljet për festën, bëjeni para se ta shtroni tapetin, jo pas. Dhe vendosni një sixhade të vogël te hyrja: në ditët e festave hyjnë shumë këpucë, dhe balta e dimrit duhet të parandalohet aty, jo te tapeti i sallonit. Se si e lajmë tapetin, hap pas hapi, e gjeni te si funksionon.